عجبتنى بعض الرباعيات لصلاح جاهين .. كتبتها .. وعجبى
إنشـد يـا قلبـي غنــوتك للجـمـال
وارقص في صـدري من اليمين للشـمال
مـا هـوش بعيـد تفضـل لبكره سـعيد
ده كـل يـوم فيـه ألف ألف احتمـال
عـجبي
أوقـات أفـوق ويحــل عنـي غبـايا
وأشـعر كأني فـهمت كـل الخبـايـا
وافتـح شـفايفي عشــان أقـول الدرر
مـا أقـولش غير حبة غزل في الصبايا
عـجبي
إيـديا فـي جيوبـي وقلبـي طـرب
سـارح في غربة بس مش مـغترب
وحـدي لكـن ونسـان وماشـي كده
وبـابتعد… ما أعرفش… أو باقترب
عـجبى
سنوات وفايته عليا فوج بعد فوج
واحدة خدتني ابن والتانية زوج
والتالتة أب خدتني .. والرابعة ايه
ايه يعمل اللي بيحدفه موج لموج
وعجبي
نظرت فوق للنجوم و انا ساير
رجليا عترت في الحفر و الحجاير
بقيت أقول و انا ع التراب: يا سلام
مش بس عبره أخذت لكن عباير
عجبي
وقفت بين شطين علي قنطـرة
الكدب فين والصدق فين يا تري
محتار ح اموت .. الحوت خرج لي وقالي
هو الكلام يتقاس بالمسـطرة
عجبي
كروان جريح مضروب شعاع م القمر
سقط من السموات فؤاده انكســـــــــر
جريت عليه قطه علشان تبلعـــــــــــه
أتاريه خيال شعراء و مالهـــــوش أثر
عجبي
جالك أوان ووقفت موقف وجـــود
يا تجود بده يا قلبي يا بده تجــــود
ما حد يقدر يبقي علي كل شـــــــئ
مع إن – عجبي – كل شئ موجود
عجبي
ليست هناك تعليقات:
إرسال تعليق