عجبتنى بعض الرباعيات لصلاح جاهين .. كتبتها .. وعجبى
فى يوم صحيت شاعر براحة وصفا
الهم زال والحزن راح واختفى
خدنى العجب وسألت روحى سؤال
أنا مت ؟ .. والا وصلت للفلسفه ؟
عجبى
دخل الشتا وقفل البيبان ع البيوت
وجعل شعاع الشمس خيط عنكبوت
وحاجات كتير بتموت فى ليل الشتا
لكن حاجات أكتر بترفض تموت
عجبى
كروان جريح مضروب شعاع م القمر
سقط من السموات فؤاده انكسر
جريت عليه قطه عشان تبلعه
أتاريه خيال شعراء ومالهوش أثر
عجبى
نسمة ربيع لكن بتكوى الوشوش
طيور جميلة بس من غير عشوش
قلوب بتخفق .. إنما وحدها
هى الحياه كده .. كلها فى الفاشوش
عجبى
وقفت بين شطين على قنطرة
الكدب فين والصدق فين يا ترى
محتار ح اموت .. الحوت خرج لى وقال
هو الكلام يتقاس بالمسطره ؟
عجبى
يا نجم .. نورك ليه كده بيرتجف ؟
هو انت قنديل زيت ؟ أو تختلف ؟
أنا نجم عالى .. بس عالى قوى
وكل ما انظر تحت اخاف انحدف
عجبى
نظرت فوقى للنجوم وانا ساير
رجليا عترت فى الحفر والحجاير
بقيت أقول وانا ع التراب : يا سلام
مش بس عبره أخذت لكن عباير
عجبى
ليست هناك تعليقات:
إرسال تعليق